మాస్ మహారాజ్ రవితేజ ప్రస్తుతం సూపర్ ఫామ్‌లో ఉన్నారు, ఎందుకంటే తన మునుపటి చిత్రం ధమాకా బాక్స్ ఆఫీస్ వద్ద బ్లాక్ బస్టర్ అయ్యింది మరియు ఆ తర్వాత, ఆయన మెగాస్టార్ చిరంజీవి యొక్క వాల్తేరు వీరయ్యలో కీలక పాత్ర పోషించి మెప్పించారు. ఇక రవితేజ తన తాజా చిత్రం రావణాసురతో ప్రేక్షకులను అలరించబోతున్నారు. అయితే ఈ సినిమాకు కావాల్సిన హైప్ క్రియేట్ చేయడంలో రావణాసుర టీమ్ విఫలమైంది.
ముఖ్యంగా సినిమాలో ఏ పాట కూడా పెద్దగా క్లిక్ అవ్వలేదు, సినిమాకు కావాల్సిన బజ్ రాకుండానే విడుదల అవుతుంది ఏమో అని అనిపించినా.. ఎట్టకేలకు నిన్న విడుదలైన ట్రైలర్ అందరినీ ఆకట్టుకుంది. ట్రైలర్ కట్ ఎక్స్‌ట్రార్డినరీగా ఉండటంతో పాటు హీరో క్యారెక్టర్‌కి మంచి ఫినిషింగ్‌ పంచ్‌తో ప్రేక్షకుల్లో ఆసక్తి నెలకొంది.
ట్రైలర్ అద్భుతమైన యాక్షన్ సీక్వెన్స్‌లతో మొదలై, ఆ తర్వాత వినోదం వైపు ఊపందుకుంది. ట్రైలర్‌లో కథను పెద్దగా వెల్లడించనప్పటికీ, రవితేజ పాత్రలో అనేక కోణాలు ఉన్నాయనే విషయం స్పష్టంగా అర్థమవుతుంది.
సుధీర్ వర్మ దర్శకత్వంలో తెరకెక్కిన రావణాసుర సినిమాలో అక్కినేని హీరో సుశాంత్ కూడా ఒక కీలక పాత్ర పోషించారు. అభిషేక్ పిక్చర్స్ మరియు RT టీమ్‌వర్క్స్‌ పై అభిషేక్ నామా మరియు రవితేజ నిర్మించిన ఈ చిత్రంలో అను ఇమ్మాన్యుయేల్, మేఘా ఆకాష్, ఫరియా అబ్దుల్లా, దక్షా నాగర్కర్, పూజిత పొన్నాడ, రావు రమేష్, మురళీ శర్మ మరియు సంపత్ రాజ్ కీలక పాత్రలు పోషించారు.
కాగా ఈ చిత్రానికి హర్షవర్ధన్ రామేశ్వర్ మరియు భీమ్స్ సిసిరోలియో స్వరాలు అందించారు. రవితేజ ధమాకా సినిమాకి కూడా భీమ్స్ సంగీతం అందించిన సంగతి తెలిసిందే. ఏప్రిల్ 7న ప్రపంచ వ్యాప్తంగా రావణాసుర సినిమా విడుదల కానుంది.