టాలీవుడ్ లో లేటెస్ట్ సెన్సేషన్ గా మసూదా చిన్న సినిమా నిలుస్తుంది. ఈ హారర్ మూవీకి విమర్శకులతో పాటు ప్రేక్షకులు కూడా ఫిదా అవుతున్నారు. ఈ చిత్రం అద్భుతమైన సమీక్షలను అందుకోవడంతోపాటు బాక్సాఫీస్ వద్ద కూడా మంచి వసూళ్లను సాధించింది. మొదటి మూడు రోజుల వసూళ్లు అద్భుతంగా ఉన్నాయి మరియు బాక్సాఫీస్ వద్ద వసూళ్లు రోజురోజుకూ పెరుగుతున్నాయి.
ఈ చిత్రం నిజానికి తక్కువ స్క్రీన్‌లతో బాక్సాఫీస్ వద్ద సాధారణ ఓపెనింగ్స్ తో ప్రారంభమైంది. అయితే పాజిటివ్ టాక్ కారణంగా సినిమా మొదటి రోజు కంటే రెండవ రోజు.. రెండవ రోజు కంటే మూడవ రోజు ఎక్కువ కలెక్షన్లతో ట్రెండ్ అయింది. మూడవ రోజు ఈ చిత్రం మొదటి రోజు కలెక్షన్ల కంటే మూడు రెట్లు ఎక్కువ వసూలు చేసింది. హైదరాబాద్ నగరం మసూదాకు అతిపెద్ద ఆదాయ ప్రాంతంగా నిలిచింది. నైజాంలో ఈ చిత్రం మొదటి వారాంతంలో దాదాపు 1.3 కోట్ల గ్రాస్‌ను వసూలు చేసింది. ఇక ఆంధ్ర ప్రదేశ్‌లో ఈ చిత్రం 1 కోటి రూపాయల గ్రాస్‌ను వసూలు చేసింది.
ఒకప్పటి హీరోయిన్ సంగీత తన యుక్తవయస్సులో ఉన్న కుమార్తెను దుష్టశక్తుల నుండి రక్షించే లక్ష్యంతో తల్లి పాత్రను ఈ చిత్రంలో పోషించారు. ఆమె నటిగా ఎప్పుడూ మంచి ఇమేజ్‌ని కలిగి ఉండగా.. ఈ పాత్రలో ఆమె అద్భుతమైన నటనతో మరోసారి తన సామర్థ్యాన్ని చూపించారు.
ఇక వర్ధమాన నటుడు తిరువీర్ కూడా తన సహజమైన నటనతో మెప్పించారు, బాంధవి శ్రీధర్ దెయ్యం చేత భాదింపబడే అమ్మాయి పాత్రలో మెప్పించారు. అలాగే ముఖ్య పాత్రల్లో సీనీయర్ నటుడు శుభలేఖ సుధాకర్, సత్యం రాజేష్ సినిమాకి మరో బలంగా నిలిచారు.
సెకండాఫ్‌లో ప్రేక్షకులను అయోమయంలో ఉంచే ఆసక్తికరమైన స్క్రీన్‌ప్లేను డీల్ చేయడంలో తొలి దర్శకుడు సాయి కిరణ్ అద్భుతంగా పని చేశారు. కొన్ని సంవత్సరాల నుండి హార్రర్ శైలిని కామెడీతో మిళితం చేసి చాలా సినిమాలు వచ్చాయి. అయితే ఈ నూతన దర్శకుడు చాలా కాలం తర్వాత నిజమైన హారర్ జానర్ పూర్వ వైభవాన్ని తిరిగి తీసుకువచ్చారు.
ఫలితంగా మౌత్ టాక్ బలంగా పెరగడంతో కలెక్షన్లు కూడా పెరుగుతున్నాయి. మూడో రోజు మొదటి రోజు కంటే మూడు రెట్లు ఎక్కువ కలెక్షన్లు వచ్చాయి. ఎప్పటికైనా కంటెంట్‌ యే కింగ్ అని మసూదా చిత్రం మరోసారి నిరూపించింది.
హారర్ జానర్‌కు తెలుగులో మంచి టార్గెట్ ఆడియన్స్ ఉన్నారు కానీ ఆ మార్కెట్‌ను ఎందుకో ఎవరూ పెద్దగా అన్వేషించలేదు. ఇంతకుముందు అరుంధతి వంటి సినిమాలు ఆ కాలంలో అద్భుతమైన వసూళ్లను సాధించాయి. మసూదా విజయంతో హారర్ సినిమాల ట్రెండ్ మరోసారి మొదలవుతుందని ఆశిద్దాం.