కరోనా పాండేమిక్ వల్ల ఒక్క హీరో అని కాదు అందరి హీరోల సినిమాలు ఆలస్యం అయ్యాయి. ఇండస్ట్రీలకి అతీతంగా ఈ ఇబ్బందులు ఎదురుకున్నారు. ఆ కారణంగా ప్రతీ స్టార్ హీరో సినిమా థియేటర్లలో విడుదల చేయడానికి సమయం పట్టింది. అందరిలాగే సూపర్ స్టార్ మహేష్ బాబు సినిమా కూడా థియేటర్లలోకి రావడానికి రెండేళ్లు పట్టింది. ఆయన నటించిన `సర్కారు వారి పాట` ఈ ఏడాది మేలో విడుదల అయిన సంగతి తెలిసిందే. తొలి రోజు మిక్స్డ్ టాక్ వచ్చినా, కలెక్షన్లు మాత్రం ఓవరాల్ గా పరవాలేదు అనిపించాయి. పెట్ల పరశురామ్ ఈ సినిమాని రూపొందించారు.
ఈ దశలో త్రివిక్రమ్ దర్శకత్వంలో మహేష్ చేయబోయే సినిమా పై సూపర్ స్టార్ అభిమానులు భారీ అంచనాలు పెట్టుకున్నారు. దాదాపు 12 ఏళ్ల విరామం తరువాత మహేష్ – త్రివిక్రమ్ ల కలయికలో రాబోతున్న సినిమా కావడంతో సహజంగానే ఈ ప్రాజెక్ట్ పై అంచనాలు ఏర్పడ్డాయి.
హారిక అండ్ హాసిని క్రియేషన్స్ బ్యానర్ పై స్టార్ ప్రొడ్యూసర్ ఎస్. రాధాకృష్ణ ఈ భారీ ప్రాజెక్ట్ ని నిర్మించబోతున్నారు. ప్రాజెక్ట్ ప్రకటించి ఏడాది కావస్తున్నా వివిధ కారణాల వల్ల ఈ సినిమా షూటింగ్ అనుకున్న దాని కంటే ఆలస్యం అవుతూ వచ్చింది. అయితే ఎట్టకేలకు ఈరోజు ఈ సినిమా షూటింగ్ తాలూకు సమాచారం అధికారికంగా ప్రకటించారు చిత్ర బృందం. నిర్మాణ సంస్థ హారిక హాసిని క్రియేషన్స్ తమ ట్విట్టర్ ద్వారా ఈ విషయాన్ని ప్రకటించారు.
అందరూ ఎంతో ఆసక్తితో ఎదురు చూస్తున్న కాంబినేషన్ కి రంగం సిద్ధం అయింది. భారీ స్థాయిలో ఈ సినిమా ప్రి ప్రొడక్షన్ పనులు ప్రారంభం అయ్యాయి అని ఈ మేరకు నిర్మాతలు తెలిపారు. ఆగస్టులో షూటింగ్ ప్రారంభం కానున్న ఈ సినిమా వచ్చే ఏడాది 2023 వేసవిలో రానుందని, భారీ విస్ఫోటనం కు సిద్ధంగా ఉండండి అంటూ అభిమానులను ఉత్తేజ పరిచే విధంగా ప్రకటించారు నిర్మాతలు.
