జబర్దస్త్ సుధీర్ టీవీ షోలలో మరియు యాంకరింగ్‌లో తనదైన చమత్కారమైన స్కిట్‌లకు పేరుగాంచారు. ఆయన తాజాగా హీరోగా నటించిన గాలోడు సినిమా ఈ శుక్రవారం విడుదలైంది. నిజానికి విడుదలకు ముందు ఈ సినిమా పై ఎవరికీ పెద్దగా అంచనాలు లేవు.
ప్రతి వారం విడుదలయ్యే సినిమాల లాగే ఇలా వచ్చి అలా వెళ్ళిపోతుంది అని అందరూ అనుకున్నారు. కానీ ఆశ్చర్యకరంగా మొదటి రోజు గాలోడు సినిమా ఆడుతున్న థియేటర్లు నిండిపోవటం అందరినీ ఆశ్చర్యపరిచింది.
సుధీర్‌కి సోషల్ మీడియాలో అద్భుతమైన ఫాలోయింగ్ ఉంది. అలాగే తన కామెడీ టైమింగ్ మరియు బయట చూపించే వ్యక్తిత్వానికి ప్రత్యేక అభిమానుల సంఖ్య కూడా ఉంది. అయితే, ఈ ఫాలోయింగ్ ప్రభావం ఇంత తీవ్రంగా ఉంటుందని బహుశా ఎవరూ ఊహించి ఉండరు.
ప్రస్తుతం తెలుగు సినిమా బాక్సాఫీస్ వద్ద చాలా పరిస్థితులు అంత బాగాలేవు. దాంతో పాటు గాలోడు సినిమాకి బలహీనమైన ప్రమోషన్లు ఉన్నప్పటికీ చక్కని కలెక్షన్లు నమోదు చేసి సుధీర్ అందరినీ ఆశ్చర్యపరిచారు.
ఈ సినిమా ప్రీ రిలీజ్ బిజినెస్ 2.75 కోట్లకు జరుపుకుంది. విడుదలైన మొదటి రోజు ఏకంగా 1.5 కోట్ల గ్రాస్ వసూలు చేసి అందరినీ ఆశ్చర్యానికి గురి చేసింది. రెండో రోజు నూన్ షోలు కూడా సూపర్ స్ట్రాంగ్ గా ఉన్నాయి.
ఇండస్ట్రీలో ఫ్యామిలీ బ్యాక్‌గ్రౌండ్ లేని హీరోకి ఈ వసూళ్లు పెద్దవి అని భావించిన ఇండస్ట్రీ మరియు ట్రేడ్ వర్గాలు కలెక్షన్స్ చూసి ఆశ్చర్యపోతున్నాయి.
గాలోడు సినిమా బిజినెస్ లో భాగమైన అందరికీ లాభదాయకమైన వెంచర్‌గా ముగుస్తుంది అని ట్రేడ్ వర్గాలు అంచనా వేస్తున్నాయి. ఈ సినిమా ఫలితం సుధీర్ కెరీర్‌లో టర్నింగ్ పాయింట్ అవుతుంది. అలాగే భవిష్యత్ లో తను నటించే చిత్రాల కోసం నిర్మాతలు సుధీర్ పై డబ్బులు పెట్టడానికి ముందుకు వస్తారు.
సుడిగాలి సుధీర్ లాగా స్వంతంగా ఎదిగిన నటుడు స్టార్‌గా వెలుగొందాలని మరియు అతని లాంటి ఎందరో వర్ధమాన నటులకు స్ఫూర్తి దాయకంగా మారాలని హృదయపూర్వకంగా ఆశిద్దాం.