మెగాస్టార్ చిరంజీవి నటించిన తాజా చిత్రం గాడ్‌ఫాదర్ విడుదలకు ఇంక వారం సమయం మాత్రమే మిగిలి ఉంది. గత చిత్రం ఆచార్య భారీ పరాజయం తర్వాత, మెగాస్టార్ చిరంజీవి గాడ్ ఫాదర్ సినిమా విషయంలో ఎలాంటి చిన్న పొరపాటు కూడా దొర్లకుండా చూసుకుంటున్నారు. ఈసారి పక్కా కమర్షియల్ అంశాలను గాడ్‌ఫాదర్ సినిమాలో పొందు పరిచేలా ఆయన అన్ని రకాల జాగ్రత్తలు తీసుకుంటున్నారు.
కాగా ఈ చిత్రంలో కీలక పాత్ర పోషిస్తున్న వర్ధమాన నటుడు సత్యదేవ్ ఒక ఇంటర్వ్యూలో సినిమా గురించి ఆసక్తికరమైన విషయాలు తెలిపారు. ఈ సినిమాలో మాతృక నుంచి మన నేటివిటీకి అనుగుణంగా చివరి నిమిషంలో కొన్ని మార్పులు చేసినట్లు వెల్లడించారు. అలాగే ఇంటర్వెల్ బ్లాక్‌తో పాటు స్క్రిప్ట్‌లో చేసిన పలు మార్పులు ప్రేక్షకులకు ఖచ్చితంగా నచ్చుతాయని, మెగాస్టార్‌ను తెర పై చూడటం ఆయన అభిమానులకి ఒక పండగలా ఉంటుందని ఆయన అన్నారు.
అంతే కాకుండా తన అభిమాన హీరో అయిన చిరంజీవిని సత్యదేవ్ పొగడ్తలతో ముంచెత్తారు. చిరంజీవి పని చేసే విషయంలో ఎంతో క్రమశిక్షణతో ఉంటారని, సెట్స్ లో చాలా చురుకుగా వ్యవహరిస్తారని.. అంతస్తులు లేదా వయసు తేడాలు చూడకుండా అందరితో ఒకేలా నడుచుకుంటారని చెప్పారు.
చిరంజీవితో సత్యదేవ్ కలిసి నటించడం ఇది రెండవ సారి. ఇటీవలే చిరంజీవి నటించిన ‘ఆచార్య’లో చిత్రంలో ప్లాష్ బ్యాక్ లో రామ్ చరణ్ తండ్రి పాత్రను (నక్సలైట్) సత్యదేవ్ పోషించిన సంగతి తెలిసిందే.
మలయాళంలో ఘనవిజయం సాధించిన ‘లూసిఫర్’ రీమేక్‌ గా తెరకెక్కిన గాడ్ ఫాదర్ సినిమాకి మోహన్‌రాజా దర్శకత్వం వహించారు. ఒరిజినల్‌లో మోహన్‌లాల్ ప్రధాన పాత్రలో నటించగా, పృథ్వీరాజ్ అతిధి పాత్రలో నటించడంతో పాటు దర్శకుడిగానూ వ్యవహరించారు. తెలుగులో ఆ అతిథి పాత్రను బాలీవుడ్ సూపర్ స్టార్ సల్మాన్ ఖాన్ చేస్తున్నారు. ఇక ఇతర ముఖ్య పాత్రల్లో నయనతార, సత్యదేవ్ మరియు మలయాళ నటుడు ఇంద్రజిత్ సుకుమారన్‌ కనిపించనున్నారు.
అక్టోబర్ 5న విడుదల కానున్న గాడ్ ఫాదర్ సినిమా మంచి ప్రీ రిలీజ్ బిజినెస్ జరుపుకుంది. కాగా ఈ చిత్రం డిజిటల్ హక్కులను నెట్‌ఫ్లిక్స్ సంస్థ 57 కోట్ల రూపాయలకు కైవసం చేసుకుంది. ఈ చిత్రం మలయాళం మరియు హిందీలో కూడా డబ్బింగ్ వెర్షన్‌లలో విడుదల కానుంది.