నందమూరి కళ్యాణ్ రామ్ హీరోగా వశిష్ట్ దర్శకత్వంలో తెరకెక్కిన చిత్రం బింబిసార. ఎన్టీఆర్ ఆర్ట్స్ బ్యానర్ పై హరికృష్ణ నిర్మిస్తున్న ఈ చిత్రం ఆగస్టు 5 న ప్రేక్షకుల ముందుకు రానుంది. ఈ నేపథ్యంలోనే ఈ సినిమా ప్రీ రిలీజ్ ఈవెంట్ శిల్పా కళావేదికలో ఘనంగా నిర్వహించారు. ఈ వేడుకకు అందరూ ఊహించినట్టు యంగ్ టైగర్ ఎన్టీఆర్ ముఖ్య అతిధిగా విచ్చేశారు. ఈ సందర్భంగా ఎన్టీఆర్ మాట్లాడుతూ ఒకరోజు కళ్యాణ్ అన్న ఫోన్ చేసి.. నాన్న.. ఒక ఆసక్తికరమైన కథను విన్నాను.. ఒక్కసారి నువ్వూ వింటే బావుంటుంది అని చెప్పినప్పుడు.. ఆరోజు తనకొక చిన్న ఐడియాగా ఈ బింబిసార కథ చెప్పడం జరిగింది.
ఆరోజు ఒక భయం మొదలైంది. అనుభవం లేకుండా కొత్తగా వచ్చిన దర్శకుడు ఇంత పెద్ద చిత్రాన్ని హ్యాండిల్ చేయగలడా లేదా అని ఒక బెరుకు.. కానీ సినిమా చూసాక.. ఎంత కసిగా అయితే సినిమా కథ చెప్పాడో.. అంతే అద్భుతంగా ఈ చిత్రాన్ని మలిచాడు. ఇది చిన్న విషయం కాదు.. ఎందుకంటే కథ తెలుసు, కథనం తెలుసు, ఆ కథలో ఏం జరుగుతుందో కూడా నాకు తెలుసు .. ఇన్ని తెలిసిన నాకు ఈ సినిమా చూసినప్పుడు గురైన ఎక్సయిట్మెంట్ ను రేపు థియేటర్ లో మీరు కూడా ఫీల్ అవుతారు. చాలా అద్భుతంగా ఈ చిత్రాన్ని తను నమ్మిన విధంగా మలచడం చిన్న విషయం కాదు. ఈ సినిమానే ఇంత అద్భుతంగా మలిచాడు అంటే దర్శకుడు వశిష్ఠ రేపు ఏ పెద్ద సినిమాను అయినా మరింత అద్భుతంగా తీయగలడని ఎన్టీఆర్ అన్నారు.
ఇక ఈ సినిమాకు ఎన్ని ఉన్నా ఒక వెలితి కనిపించిందని, అదే ఎమ్ఎమ్ కీరవాణి.. ఆయన ఈ సినిమాకు ఇచ్చిన బ్యాక్ గ్రౌండ్ మ్యూజిక్ చూస్తే.. ఈ చిత్రానికి ఆయనే బ్యాక్ బోన్ అని అందరూ అంటారని ఎన్టీఆర్ కీరవాణిని కొనియాడారు. ఇక ఇదే స్టేజ్ మీద ఒక మాట అభిమానులకు నచ్చేవరకు సినిమాలు చేస్తూనే ఉంటామని చెప్పిన విషయాన్ని గుర్తు చేసుకుంటూ ఇప్పుడు ఈ స్టేజి పై చెప్తున్నాను.. ఈ సినిమా తరువాత కళ్యాణ్ రామ్ ఎక్కువ కాలర్ ను ఎగరేస్తారని, కళ్యాణ్ రామ్ కెరీర్ బింబిసార కు ముందు బింబిసార తరువాత అని ఖచ్చితంగా అనుకుంటారని ఎన్టీఆర్ చెప్పారు. కల్యాణ్ రామ్ పడే కష్టం నిజంగానే తెరపై కనిపించదని.. తమ్ముడిని కాబట్టి ఎక్కువసార్లు ఆయనను కలిసే అవకాశం ఉంటుంది కాబట్టి తనకు ఆయన ఎంత కష్టపడతారో తెలుసు అని ఎన్టీఆర్ చెబుతూ కళ్యాణ్ రామ్ లేకపోతే బింబిసార స్థానంలో ఎవరిని ఉహించుకోలేం అని అన్నారు.
ఇక ప్రస్తుతం తెలుగు ఇండ్టస్త్రీ పై వస్తున్న వార్తల పై కూడా ఎన్టీఆర్ మాట్లాడారు. ఇండస్ట్రీకి గడ్డుకాలం అంటున్నారు. థియేటర్స్ కు ప్రేక్షకులు రావడం లేదంటున్నారు.. ఇవన్నీ నేను నమ్మను. అద్భుతమైన సినిమా వస్తే చూసి ఆదరించే గొప్ప మనసున్న తెలుగు ప్రేక్షక దేవుళ్లు మీరందరు.. అదే తరహాలో గొప్ప కంటెంట్ గల బింబిసారను కూడా ఆదరిస్తారని, అలాగే ఈ సినిమాతో పాటు సీతారామం కూడా వస్తోంది .. ఆ చిత్రాన్ని కూడా ఆదరిస్తారని కోరుకుంటూ, మా తాత గారు మరియు మా నాన్న గారు వదిలి వెళ్లిన అభిమానులు మీరు.. జాగ్రత్తగా ఇంటికి వెళ్లండి అంటూ ఎప్పటిలాగే అభిమానుల క్షేమం కోరుతూ ఎన్టీఆర్ తన ప్రసంగాన్ని ముగించారు.