పాన్ ఇండియా స్టార్ ప్రభాస్ నటిస్తున్న తాజా చిత్రం “ఆదిపురుష్”. రామాయణ ఇతిహాసం ఆధారంగా ఈ పౌరాణిక కథను బాలీవుడ్ దర్శకుడు ఓం రౌత్ తెరకెక్కిస్తున్నారు. ఇందులో కృతి సనన్ – సైఫ్ అలీ ఖాన్ ఇతర ప్రధాన పాత్రల్లో నటిస్తున్నారు. సంక్రాంతి సందర్భంగా విడుదల కానున్న ఈ సినిమాకు సంబంధించి ఇటీవలే విడుదలైన టీజర్‌కు మిశ్రమ స్పందన వచ్చింది. వీఎఫ్‌ఎక్స్ నాసిరకంగా ఉన్నాయని, కార్టూన్ సినిమాలా ఉందని సోషల్ మీడియాలో చాలా రకాలుగా ట్రోల్స్ కూడా వచ్చాయి. అయితే తాజాగా ఈ టీజర్ పై టాలీవుడ్ హీరో మంచు విష్ణు తన అభిప్రాయాన్ని తెలియజేస్తూ ‘ఆదిపురుష్’ సినిమా పై కీలక వ్యాఖ్యలు చేశారు.
‘ఆదిపురుష్’ టీజర్ చూసి తాను మోసపోయానని మంచు విష్ణు ప్రముఖ బాలీవుడ్ మీడియాకు ఇచ్చిన ఇంటర్వ్యూలో బహిరంగంగానే తన అసంతృప్తిని వ్యక్తం చేశారు. రామాయణం ఆధారంగా తెరకెక్కుతున్న ఆదిపురుష్ సినిమా లైవ్ యాక్షన్ మూవీ అవుతుందని తనతో పాటు ప్రేక్షకులందరూ అనుకున్నారని విష్ణు తెలిపారు. ఇది యానిమేషన్ సినిమా అవుతుందని ఎవరూ ఊహించలేదు. అందుకే అందరూ నిరాశ చెందారు. ఇది యానిమేషన్ సినిమా అని ముందుగా చిత్ర బృందం ప్రేక్షకులను ప్రిపేర్ చేసి ఉంటే బాగుండేదని విష్ణు అభిప్రాయపడ్డారు.
మంచు విష్ణు తాజా చిత్రం ‘జిన్నా’ విడుదలకు సిద్ధంగా ఉంది. సన్నీలియోన్, పాయల్ రాజ్‌పుత్ హీరోయిన్లుగా నటిస్తున్న ఈ సినిమా మలయాళం, హిందీ భాషల్లో కూడా విడుదల కానుంది. హిందీలో “జిన్నా భాయ్” పేరుతో ప్రచారం జరుగుతోంది. ఇందులో భాగంగా తాజాగా ఆయన బాలీవుడ్ మీడియాకు ఇంటర్వ్యూ ఇచ్చారు. ఇందులో భాగంగా ‘ఆదిపురుష్’ టీజర్ పై జరుగుతున్న ట్రోలింగ్‌ పై తన అభిప్రాయాన్ని పంచుకున్నారు.
తెలుగు వ్యక్తిగా నా అభిప్రాయాన్ని తెలియజేస్తున్నాను. రామాయణం ఆధారంగా రూపొందినందున ఇది మెయిన్ స్ట్రీమ్ లైవ్ యాక్షన్ చిత్రం అవుతుందని అంతా అనుకున్నారు. కానీ యానిమేషన్ చిత్రం అవుతుందని ఎవరూ ఊహించలేదు. అందుకే అందరూ నిరాశ చెందారు. అయితే ఇది యానిమేషన్ చిత్రం అని చెప్పి టీజర్‌ని విడుదల చేసి ఉంటే, ట్రోల్స్ వచ్చేవి కావు అని మంచు విష్ణు అన్నారు. కాగా ఆదిపురుష్ టీజర్ సరిగ్గా రజనీకాంత్ సినిమా ‘కొచ్చాడయాన్’ లా ఉందని మంచు విష్ణు తెలిపారు.
మంచు ఫ్యామిలీ ఎప్పుడూ వివాదాస్పద ప్రకటనలు మరియు సంఘటనలకు పేరుగాంచింది. అంతే కాక తరచుగా వారు అపరిపక్వంగా వ్యవహరించడం.. వారి అసంకల్పిత తమాషా ప్రవర్తన కారణంగా ట్రోల్ చేయబడతారు. మరి మంచు విష్ణు తాజాగా చేసిన ఈ వ్యాఖ్యలపై ప్రభాస్ అభిమానుల స్పందన ఎలా ఉంటుందో వేచి చూడాలి.