హీరో నిఖిల్ కెరీర్‌లోనే కార్తికేయ-2 టర్నింగ్ పాయింట్ గా నిలిచింది. ఈ చిత్రం ప్రపంచ వ్యాప్తంగా 100 కోట్లకు పైగా గ్రాస్ వసూలు చేసింది. అంతే కాకుండా పాన్-ఇండియన్ బ్లాక్‌బస్టర్‌గా నిలిచింది. ఈ చిత్రం హిందీ వెర్షన్‌లో కూడా 30 కోట్లకు పైగా నెట్ వసూలు చేసి మంచి ప్రదర్శన ఇచ్చింది. నిజానికి తొలి రోజు చాలా తక్కువ థియేటర్లలో విడుదల అయినప్పటికీ, పాజిటివ్ టాక్ కారణంగా ఈ చిత్రానికి ఎక్కువ స్క్రీన్‌లు లభించి ఉత్తరాది మార్కెట్‌లో మంచి లాంగ్ రన్ వచ్చింది.
ఇప్పుడు ఈ చిత్రానికి మూడవ భాగాన్ని త్వరగా విడుదల చేసి క్రేజ్‌ని పెంచుకునే ప్లాన్‌లో చిత్ర బృందం ఉన్నట్లు తెలుస్తోంది. ఈ రోజుల్లో సీక్వెల్స్‌కు ప్రేక్షకుల్లో విపరీతమైన క్రేజ్ ఉంది. ఫ్రాంచైజీ సినిమాలను చూడటానికి ప్రేక్షకులు చాలా ఆసక్తి చూపుతున్నారు. ఈ తరహా సినిమాలే ఇప్పుడు బాక్సాఫీస్ వద్ద ఎక్కువ విజయాలు సాధిస్తున్నాయి.
చందు మొండేటి దర్శకత్వంలో అభిషేక్ అగర్వాల్ ఆర్ట్స్ పీపుల్ మీడియా ఫ్యాక్టరీ సంయుక్తంగా నిర్మించిన కార్తికేయ-2 బాక్సాఫీస్ వద్ద తన అద్భుతమైన ప్రదర్శనతో ట్రేడ్ వర్గాలను విస్మయానికి గురిచేసింది. ఈ సినిమాతో నిఖిల్ పాన్ ఇండియా స్టార్ అయిపోయారు.
కాగా మూడో భాగం గురించి హీరో నిఖిల్ మీడియాతో మాట్లాడుతూ తాజాగా కొన్ని ఆసక్తికర విషయాలను వెల్లడించారు. కార్తికేయ సినిమా చేస్తున్నప్పుడు సీక్వెల్ తీయాలని తాను కానీ, దర్శకుడు కానీ ఎప్పుడూ అనుకోలేదని చెప్పారు.
అంతే కాకుండా మొదటి భాగం విడుదలైన తర్వాత ఎక్కడికి వెళ్లినా కార్తికేయ 2 షూటింగ్ జరుగుతోందా లేదా అని అడిగారని, నిఖిల్ చెప్పారు. కాగా ఇప్పుడు కార్తికేయ 3 గురించి కూడా అలానే అడుగుతున్నారని నిఖిల్ తెలిపారు. ఇక త్వరలోనే ఈ చిత్రం ప్రారంభం కానుందని తెలియజేసారు.
బాహుబలి-2 మరియు KGF-2 సినిమాలు బాక్సాఫీస్ వద్ద భారీ బ్లాక్‌బస్టర్‌లుగా నిలిచిన సంగతి తెలిసిందే. మరియు ప్రేక్షకులు ఆ సినిమాలకు ఇంకా కొనసాగింపు ఉంటే బాగుండేదని కోరుకుంటున్నారు. కార్తికేయ-2కి కూడా చాలా సానుకూల స్పందన వచ్చింది. మరి మూడవ భాగం కోసం నిజంగానే ప్రేక్షకులు ఎదురు చూస్తారు.
ఖచ్చితంగా కార్తీకేయ 3 అందరి దృష్టిని ఆకర్షిస్తుంది. దాంతో పాటు సినిమాకు భారీ స్థాయిలో హైప్ కూడా ఉంటుంది. కార్తికేయ టీమ్ ప్రేక్షకుల అంచనాలను అందుకుని మరో విజయవంతమైన చిత్రాన్ని అందించాలని కోరుకుందాం.