ఈ దసరా సందర్భంగా తెలుగు సినీ ప్రేక్షకులకు భారీ వినోదం అందించేందుకు మూడు సినిమాలు విడుదలయ్యాయి. అందులో మెగాస్టార్ చిరంజీవి నటించిన తాజా చిత్రం గాడ్ ఫాదర్ ఒకటి. ఇంకో సినిమా కింగ్ నాగార్జున నటించిన ది ఘోస్ట్. ఈ రెండు అగ్ర హీరోల చిత్రాలతో పాటు ప్రముఖ నిర్మాత బెల్లంకొండ సురేష్ తనయుడు గణేష్ తొలిసారిగా వెండితెరకు పరిచయం చేస్తూ స్వాతి ముత్యం సినిమా కూడా విడుదల అయింది.
ఇక చిన్న సినిమా అయినా, ధైర్యం చేసిన స్వాతి ముత్యం నిర్మాతలు.. నిన్న రాత్రే తెలుగు రాష్ట్రాల్లో ప్రీమియర్ షోలు వేశారు. ఆ ప్రీమియర్ షోల నుండి ప్రేక్షకుల నుంచి చక్కని స్పందనను సొంతం చేసుకుంది. ఈ సినిమా హాయిగా నవ్వించే ఒక క్లీన్ ఎంటర్‌టైనర్ అని అంటున్నారు. అంతే కాక చాలా కాలం తర్వాత టాలీవుడ్ నుంచి వచ్చిన ఒక ఫుల్ లెంగ్త్ ఎంటర్‌టైనర్ అని కూడా అంటున్నారు.
ఇక ప్రవీణ్ సత్తారు దర్శకత్వంలో కింగ్ నాగార్జున నటించిన ది ఘోస్ట్ చిత్రం యావరేజ్ రిపోర్ట్‌లను తెచ్చుకుంది. కాగా మొదటి సగం అంచనాలను అందుకోలేక మిశ్రమ స్పందనను తెచ్చుకోగా.. రెండవ సగం మాత్రం ఏకగ్రీవంగా సానుకూల స్పందన వస్తోంది. ఈ చిత్రంలో యాక్షన్ ఎపిసోడ్స్ హైలైట్ గా చెప్తున్నారు. మొత్తానికి మధ్య కాలంలో నాగార్జునకు ఉపశమనం కలిగిస్తుందని అంటున్నారు.
ఇక ఈ రోజు విడుదలైన అన్ని చిత్రాల్లోకి ఎక్కువ క్రేజ్ తో వచ్చిన చిత్రం గాడ్ ఫాదర్. మెగాస్టార్ చిరంజీవి ప్రధాన పాత్రలో నటించిన గాడ్ ఫాదర్ సినిమాకి ఏకగ్రీవంగా అద్భుతమైన సమీక్షలు వచ్చాయి. దర్శకుడు మోహన్ రాజా తెలుగు ప్రేక్షకులకు అనుగుణంగా ఒరిజినల్ సినిమా లూసిఫర్ నుంచి గాడ్ ఫాదర్ కు సరైన మార్పులు చేసారని సినిమా చూసిన ప్రేక్షకులు అంటున్నారు. రీమేక్ సినిమాలు తెరకెక్కించడంలో మోహన్ రాజాకి ఒక ప్రత్యేకమైన శైలి ఉన్న సంగతి తెలిసిందే.
చిరంజీవి నటించిన చివరి చిత్రం ఆచార్య భారీ పరాజయం పాలైన విషయం తెలిసిందే. అందువల్ల ఈ సినిమాతో మెగాస్టార్ గట్టిగా కమ్ బ్యాక్ ఇస్తారని మెగా అభిమానులు చాలా ఆశలు పెట్టుకున్నారు. వారి ఆశలు నిజం అయినట్టే కనిపిస్తున్నాయి. కాగా ఈ చిత్రంలో చిరంజీవి బిల్డప్ షాట్లు మరియు హీరోయిజాన్ని చూపించే సన్నివేశాలు మెగా అభిమానులతో పాటు ఇతర సాధారణ ప్రేక్షకులకు ఘనమైన విందుగా ఉంటాయని సమాచారం.