బాలీవుడ్ పాన్ ఇండియా మూవీ ”బ్రహ్మాస్త్ర” ప్రీ రిలీజ్ ఈవెంట్ ను ఈ శుక్రవారం హైదరాబాద్ లో గ్రాండ్ గా చేయాలని ప్లాన్ చేసిన సంగతి తెలిసిందే. రామోజీ ఫిల్మ్ సిటీలో జరగనున్న ఈ వేడుకకు యంగ్ టైగర్ ఎన్టీఆర్ చీఫ్ గెస్టుగా వస్తారని చిత్ర బృందం కొన్ని రోజుల క్రితం ప్రకటించారు. అయితే చివరి నిమిషంలో ఈ ప్రీ రిలీజ్ ఈవెంట్ ను క్యాన్సిల్ చేశారు. ఈ మేరకు చిత్ర బృందం అధికారిక ప్రెస్ నోట్ రిలీజ్ చేశారు.
అయితే ‘బ్రహ్మాస్త్ర’ ప్రీ రిలీజ్ ఈవెంట్ ను రద్దు చేసినప్పటికీ .. పార్క్ హయత్ హోటల్ లో ప్రెస్ మీట్ నిర్వహించి అదే మీడియా కార్యక్రమానికి జూనియర్ ఎన్టీఆర్ అతిథిగా హాజరయ్యారు. ఎలక్ట్రానిక్ మరియు ప్రింట్ మీడియాతో పాటు పరిమిత సంఖ్యలో ప్రేక్షకులను కూడా అనుమతించిన ఈ ఈవెంట్ లో ఎన్టీఆర్ తనదైన శైలిలో ప్రసంగించి ఆకట్టుకున్నారు.
ముందుగా ఎన్టీఆర్.. ఆయన అభిమానులకు క్ష‌మాప‌ణ‌లు తెలియ‌జేశారు. ఘనంగా ఈ బ్రహ్మస్త్ర చిత్ర ప్రి రిలీజ్ వేడుక చేయాల‌నుకున్నాము.. భద్రతా కారణాల వల్ల పోలీసులు అనుమతి నిరాకరించడంతో ఈవెంట్ రద్దు చేయాల్సి వచ్చింది. పోలీసులు ఎది చెప్పినా మ‌న సేఫ్టీ కోసమే చెప్తారు. వారి మాట‌ల‌ను వినాల్సిన బాధ్య‌త పౌరులుగా మ‌న‌కుంది అని ఎన్టీఆర్ అన్నారు. అలాగే సినిమా ఇండస్ట్రీ ఎదుర్కుంటున్న పలు సమస్యల పై కూడా ఎన్టీఆర్ వ్యాఖ్యానించారు. ఫలానా ఇండస్ట్రీ అని కాకుండా గ్లోబల్ గా సినిమా ఇండస్ట్రీ ఒత్తిడిలో ఉందని ఆయన అన్నారు. ప్రేక్షకులు ఏదో ఒక కొత్తదనం కోరుకుంటున్నారు. అందుకని దీన్ని ఒక సవాలుగా తీసుకుని పని చేయాలని అన్నారు. ఎందుకంటే ఒత్తిడిలో ఉన్నప్పుడే ఉత్తమంగా పని చేస్తామని ఎన్టీఆర్ చెబుతూ.. అందరం అలా కష్టపడి ప్రేకకకులకి కావాల్సిన గొప్ప అనుభూతిని ఇవ్వాలని.. అలాగే బ్రహ్మాస్త్ర సినిమా భారతీయ సినిమా పరిశ్రమకు ఒక బ్రహ్మాస్త్రం లాగా అవ్వాలని ఎన్టీఆర్ ఆశించారు.
కాగా బాలీవుడ్ డైరెక్టర్ అయాన్ ముఖర్జీ తెరకెక్కించిన ‘బ్రహ్మాస్త్ర’ సినిమాలో రణ్ బీర్ కపూర్ – ఆలియా భట్ – అమితాబ్ బచ్చన్ – కింగ్ అక్కినేని నాగార్జున ప్రధాన పాత్రలు పోషించారు. స్టార్ స్టూడియోస్ – ధర్మ ప్రొడక్షన్స్ – ప్రైమ్ ఫోకస్ మరియు స్టార్ లైట్ పిక్చర్స్ సంస్థలు కలిసి భారీ బడ్జెట్ తో ఈ సోసియో ఫాంటసీ చిత్రాన్ని నిర్మించారు.
మూడు భాగాలుగా రూపొందించిన ఈ సినిమా మొదటి భాగం ”బ్రహ్మాస్త్రం: శివ” పేరుతో పాన్ ఇండియా స్థాయిలో పలు ప్రధాన భారతీయ భాషల్లో విడుదల కాబోతోంది. ఈ చిత్రానికి దక్షిణ భాగంలో ఎస్. ఎస్. రాజమౌళి సమర్పకులుగా వ్యవహరిస్తున్నారు. ‘బ్రహ్మాస్త్ర’ సినిమా సెప్టెంబర్ 9న ప్రపంచ వ్యాప్తంగా థియేటర్లలోకి రాబోతోంది.